ഒറ്റനിറം കൊണ്ടുള്ള ഞാനെന്ന വര:

എല്ലാ വരകളും 
ഉരുകിയൊലിച്ചു പോകുന്ന 
ഒരു കൊടുംവേനല്‍ ക്യാന്‍വാസില്‍ 
തനിച്ചിരുന്ന് , 
ചിത്രകാരാ 
ഞാന്‍ നിന്നെയോര്‍ക്കുകയാണ് ..

കാലം പൊള്ളുന്നു !
ഇവിടെയിപ്പോള്‍
ഞാന്‍ മാത്രമാണ് ,
ഏകാന്തതയുടെ ഒറ്റനിറത്തിന്
നീ എന്‍റെ പേരിട്ടു പോയി..

വിരല്‍ത്തുമ്പിനാലെന്‍റെ
ഇളം നിറത്തിലേയ്ക്ക്
ഒരിക്കല്‍
നീ തിരികെ വന്നിട്ട് ,
കൂട്ടി ചേര്‍ക്കണം
തണലിനായി
ഒരു തളിര്‍ച്ചില്ലയെങ്കിലും...

എങ്കില്‍,
നിന്‍റെ പേരില്‍ ഞാന്‍
ഇനി ഓരോ ഋതുവിനെയും
ഓര്‍ക്കും..