കാവല്‍ക്കാരന്‍

അന്തേവാസികളോരോന്നായ്
വീടേറുന്നു !
തുറന്നിട്ട ജാലകവാതിലുകളിലൂടാരോ
ചവച്ചുതുപ്പിയ മാതിരി
നേര്‍ത്ത പ്രകാശം !
ചില വാതിലുകള്‍ അനക്കമറ്റും,
മറ്റു ചിലത്,
ആരെയോ കാത്തെന്നപോലെ
കാറ്റിലാടിയും
പാതിചാരപ്പെട്ടിരിക്കുന്നു !
ഇനിയുമതിഥികള്‍ നടയേറി വന്നേക്കാം
ഇനിയുമാളുകള്‍ പടിയിറങ്ങി പോയേക്കാം
എങ്കിലും ഞാന്‍ നിശ്ചലനായി
സ്വപ്‌നങ്ങള്‍ നിദ്രയുടെ
താഴ്വാരയിറങ്ങിയെത്തുമ്പോള്‍
ഉറക്കം വെടിഞ്ഞീ നായ്ക്കള്‍ക്കൊപ്പം
ഞാനീ ഇരുളുറങ്ങുന്നതും കാത്ത് !