വസന്തത്തെ വിഴുങ്ങിയ ശിശിരം

ഞാനും അറിഞ്ഞിരുന്നു 

എപ്പോഴൊക്കെയോ 

ചിരിമൊട്ടുകള്‍ തുന്നിചേര്‍ത്ത 

വസന്തത്തിന്റെ 

ഒരു കോണില്‍നിന്നും ശിശിരം 

ഇലകള്‍ കൊഴിച്ചു തുടങ്ങിയത്..

വാനം കണ്ണീര്‍ തൂവി തുടങ്ങിയത് !

കടലും ചിപ്പിയും

നിന്റെ കടലോളം സ്നേഹത്തില്‍
നീന്തി തുടിക്കുവാന്‍
കൊതിച്ചൊരു ചിപ്പിയാണ് ഞാന്‍...
നിന്നോടുള്ള പ്രേമം
എന്റെ ആഴങ്ങളില്‍ മുത്തായി വിരിഞ്ഞിരുന്നു !
കാറ്റായും തിരയായും വിധി
വിദൂരങ്ങളിലെ അഴുക്കുചാലില്‍
ഒരുനാള്‍ എന്നെ ഏറിയും വരെ
നിന്നിലെ ഗാനങ്ങള്‍ എന്നുള്ളില്‍ മുഴങ്ങിയിരുന്നു !

ഇരുളില്‍ വിരിഞ്ഞ പൂവ്

ഇരുളില്‍ വിരിഞ്ഞ പൂവേ ,
ഇരുളുവോളം നിനക്കായി ഞാന്‍ കാത്തിരുന്നിട്ടും ,
തളര്‍ന്നു ഞാന്‍ വീണുറങ്ങിയപ്പോഴാണല്ലോ
നീ വിടര്‍ന്നത് !
കാറ്റ് വന്നു നിന്നെ മണ്ണില്‍ വീഴ്ത്തിയപ്പോഴും
മഴ വന്നു നിന്നെ പൊതിഞ്ഞപ്പോഴും
അറിയാതെ പോയി
കാത്തിരുന്നത് നിനക്ക് വേണ്ടിയായിരുന്നു എന്ന് !
അറിഞ്ഞിരുന്നെങ്കില്‍ ........

കാറ്റും പൂവും

വിരിയും മുന്‍പേ കൊഴിയുവാനല്ല പുഷ്പമേ നിന്നുള്ളില്‍ ഞാന്‍ തേന്‍ നിറച്ചത് !

സൌരഭ്യം പരത്തും മുന്‍പേ മണ്ണടിയുവാനല്ല നിന്റെ ഇതളുകള്‍ക്ക്‌ ഞാന്‍ നറുമണം സമ്മാനിച്ചത്‌ !

നിന്റെ ജീവനില്‍ ഞാന്‍ കാറ്റായി ഒഴുകിയെത്തിയത് നിനക്ക് അഴക്‌ പകരാനാണ് ...

തളര്‍ന്നു വീഴുവാനല്ല !

കാലം

എനിക്കും നിനക്കും  മുന്‍പേ 

പായുന്ന കാലത്തിനറിയില്ലല്ലോ,

ഹൃദയത്തിന്റെ വിങ്ങലും 

പ്രണയത്തിന്റെ ആഴവും !

സ്വപ്നം

എനിക്കെത്താനവാത്ത ദൂരങ്ങളിലെ 

സുന്ദരമായ  ചിത്രങ്ങള്‍,

മനസ്സിന്റെ ക്യാന്‍വാസില്‍ പകര്‍ത്തി 

അജ്ഞാതമായ ലോകത്തേയ്ക്ക് 

ഓടിമറയുന്ന ഓര്‍മയാണ് സ്വപ്നം !

കണ്ണിമ തുറക്കുവോളം എന്നെ വാരിപ്പുണര്‍ന്നിട്ട് 

ഒരിറ്റു വെളിച്ചത്തിന്റെ തുമ്പില്‍ 

ഊഞ്ഞാലാടി മറയുന്ന മായ !

നന്ദിത പറയുന്നു

ചിലപ്പോഴെങ്കിലും മരണത്തിന്റെ നിഗൂഡതകള്‍ക്ക് ,

ആരെയും കാത്തു നില്‍ക്കാതുള്ള 

ജീവിതത്തിന്റെ വേഗതയെക്കാളും 

മാസ്മരമായൊരു സൌന്ദര്യമുണ്ടല്ലേ ?

ഇല്ലായിരുന്നെങ്കില്‍ ഇന്ന് നീ 

എന്റെ വാക്കുകളില്‍ നിന്നെ തന്നെ കണ്ടെത്തുമായിരുന്നോ ?? 

എന്നെ തേടി ഇവിടെ എത്തുമായിരുന്നോ ??

പ്രണയത്തിന്റെ സ്വര്‍ഗ്ഗം

പ്രണയത്തിന്റെ മാധുര്യം
നിറഞ്ഞ സ്വര്‍ഗ്ഗത്തിലും
ഏകാന്തതയുടെ
പൊള്ളലുള്ള  തീക്കൂനയിലും
നഷ്ടങ്ങളുടെ ദുര്‍ഗന്ധം
വമിക്കുന്ന നരകത്തിലും
സഞ്ചാരം നടത്തി
എന്റെ മനസ്സ് തിരികെ വന്നിരിക്കുന്നു

തളര്‍ന്ന മനസ്സിലിപ്പോഴും
കരിയാത്തൊരു പോള്ളലിന്റെ
നീറുന്നൊരു മുറിവുണ്ട്
അതില്‍ ദുര്‍ഗന്ധവും !
ഇനി വിശ്രമിക്കണം
അല്പം മധുരം നുണയണം..