മരണത്തിലെ സൌന്ദര്യം

നീ കോര്‍ത്തുതന്ന ഇരയുടെയുള്ളിലെ
കൂര്‍ത്ത കൊളുത്ത് ,
എന്‍റെ ജീവിതമെടുക്കും
എന്നറിയാഞ്ഞത് കൊണ്ടല്ല ,
പിടഞ്ഞു മരിക്കുന്നത്
നിന്‍റെ കൈകളില്‍തന്നെയല്ലോ
എന്ന സമാധാനത്തിനു വേണ്ടിയാണ്..

പണ്ട് നീയുപേക്ഷിച്ച വലയില്‍ നിന്നും
ഞാന്‍ നേടിയ ജീവിതമെനിക്കു തന്നത്
ഒരു കടലും
ഒരായിരം കടലിരമ്പങ്ങളുമാണ്..
എങ്കിലും പ്രിയപ്പെട്ട മുക്കുവാ,
നിനക്ക് വേണ്ടിത്തന്നെയാണ്
ഇക്കണ്ട തിരയെല്ലാം താണ്ടി
ഞാനെത്തിയത് ..