Tuesday, October 29, 2013

ഈശ്വരനോട്

ഈശ്വരാ ജഗദീശ്വരാ
ഇനിയുമൊരു ജന്മം
കനിവാര്‍ന്നു തരുകില്‍
ഒരപേക്ഷ കേട്ടരുളുക
നീയെനിക്കീ മണ്ണിലൊരു
മനുഷ്യരൂപമേകരുതേ !

അമ്മ തന്‍ കൈകളാല്‍
ചോര വാര്‍ന്നൊഴുകുന്ന
കൈക്കുഞ്ഞുങ്ങളും,
തവ സന്നിധിയില്‍ തന്നമ്മയെ
നേര്‍ച്ചപോലെറിഞ്ഞീടുന്ന
പ്രിയസുതരും ,
പ്രണയമാമമൃതില്‍
നന്നേ വിഷം നിറച്ചുപ്രാപിക്കുന്ന
കാമക്കണ്ണുകളും ..!

നീ തീര്‍ത്ത ഭൂമിയില്‍
നീ തീര്‍ത്ത സ്നേഹത്തില്‍
നിന്നരുമ മക്കളില്‍
പാപച്ചാലുകള്‍
നിറയുന്നു വിഭോ,
കാണുന്നുവോ നീ
അറിയുന്നുവോ നീ .. ??

കാണുമ്പോള്‍ കരയാതിരിക്കാന്‍
കല്ലുകൊണ്ടൊരു ഹൃദമേകുക ,
ഓര്‍ക്കുമ്പോള്‍ ഇടറാതിരിക്കുവാന്‍
ആത്മാവിലൊരു പടച്ചട്ട നല്‍കുക ..
ഈശ്വരാ ജഗദീശ്വരാ
ഇനിയുമൊരു ജന്മം
കനിവാര്‍ന്നു തരുകില്‍
ഒരപേക്ഷ കേട്ടരുളുക
നീയെനിക്കീ മണ്ണിലൊരു
മനുഷ്യരൂപമേകരുതേ !

1 comment:

  1. ഈശ്വരനനുഗ്രഹിക്കട്ടെ.


    നല്ല കവിത

    ശുഭാശംസകൾ...

    ReplyDelete