ഹര്‍ത്താല്‍ മാമാങ്കം

മാറുന്ന ട്രെണ്ട്കള്‍ക്കൊപ്പം

മാറുന്ന ചിന്തകളില്‍ 

ഇന്നത്തെ വിജയി ഹര്‍ത്താലാണ് !

വെട്ടിക്കൊന്നും 

ഒന്നുമറിയാത്തവന്‍റെ കരളു 

ചുട്ടുതിന്നും ജയിച്ചവന്‍ ,

അത്താഴപട്ടിണിക്കാരന്‍റെ 

ചെറുകടയിലെ കണ്ണാടിചില്ല് 

അടിച്ചു തകര്‍ത്തും ,

വഴിയാത്രക്കാരന്‍റെ തലയെറിഞ്ഞു 

പൊട്ടിച്ചും 

വിജയമാഘോഷിക്കുന്നുണ്ട് !

തെരുവുനായയെ പോലെ   

വെട്ടേറ്റു പെരുവഴിയില്‍ 

അലറിക്കരയുന്നവന്‍റെ 

തലയ്ക്കല്‍ പതാകകളുമായി 

മുദ്രാവാക്യം വിളിച്ച് 

ഹര്‍ത്താലിനെതിരെ ഹര്‍ത്താലുമായി  

രാഷ്ട്രീയം രംഗത്ത് !

ജയിച്ചവനും തോറ്റവനും ചുറ്റും  

ക്യാമറപ്രത്യക്ഷണം നടത്തുന്നുണ്ട് 

ചാനല്‍വീരന്മാര്‍ ,

കണ്ണീരും വിലാപവും 

ഉപ്പും എരിവും ചേര്‍ത്തു കാണികള്‍ക്ക് 

സ്വാദോടെ വിളമ്പണമല്ലോ !

പുര കത്തുമ്പോള്‍ വാഴനടാന്‍  

പെട്രോളിനും, ശ്വസിക്കുന്ന വായുവിനും 

വിലയിട്ട് ,

ജനപ്രതിനിധികള്‍ കീശനിറയ്ക്കും !

ഈ ഗണങ്ങളില്‍ പെടാത്തവര്‍ 

യുദ്ധഭൂമിയില്‍ പുഴുക്കളെ പോലെ 

അരിച്ചു നടക്കുന്നു ,

അടുത്ത ഹര്‍ത്താലിന്‍റെ ഇരകളാകാന്‍ !!